Ièr, lo 1r de julhet, es intrada en vigor la nòva nòrma europèa qu’obliga las entrepresas telefonicas de baissar los prèses als sieus clients quand se desplaçan en defòra de la frontièra politica. Segon los calculs de la Comission Europèa, lo reglament permetrà d’estalviar 200 èuros a una familha que passe las vacanças a l’estrangièr, e mai de 1000 èuros l’an als entrepreneires que viatjan per l’Union Europèa.

Dempuèi lo 1r de julhet, lo prètz maximal autorizat per lei per l’usatge d’Internet mobil en defòra de la frontièra politica es de 0,70 èuro per megaoctet, que se redusirà a 0,45 èuro en julhet de 2013, e a 0,20 en julhet de 2014. Los autres prèses maximals son 0,29 èuro la minuta per far una telefonada, 0,08 èuro la minuta per recebre una telefonada e 0,09 èuro per mandar un messatge de tèxt. A aqueles prèses i caldrà totjorn apondre la TVA.
 
Aqueles prèses nòus son estats fixats après remarcar que las entrepresas operatrises an pas repercutit suls sieus clients la reduccion de prèses dels lors provesidors, malgrat los multiples avertiments de Brussèlas. Al delà, las tarifas per la transmission de donadas a l’estrangièr contunhan d’èsser fòrça mai nautas qu’al nivèl estatal.
 
“Avèm mes fin a las fraudariás que coneisson totes aqueles qu’an emplegat un telefòn mobil mentre qu’èran en viatge a l’estrangièr”, çò diguèt la comissària de las Telecomunicacions, Neelie Kroes.
 
Fins ara i aviá pas de prètz maximal regulat. Fòrça entrepresas operatrises prenián mai de 4 èuros per megaoctet en julhet de 2009, es a dire qu’aquel prètz serà 6 còps mens car.
 
Las entrepresas operatrises an libertat per ofrir de tarifas a melhor mercat. Aqueles prèses son sonque la limitacion maximala qu’agís coma barrièra de seguretat.